Бөлүмдөр
Дүйшөмбү, 21-октябрь
Нарын облусу, Нарын 26.07.2019 15:38 Жаңыланды: 26.07.2019 18:52 На русском

Германияга барган тоолук окуучу Айжанатты бир окуя аң-таң кылды. Сүрөт

Айжанат Рысбек кызы
Айжанат Рысбек кызы
// Turmush

Turmush -  Нарын шаарынын 17 жаштагы тургуну Айжанат Рысбек кызы тил үйрөнүү менен алек болуп, азыртадан ийгиликтерди жаратып келет. Аны менен аймактык кабарчы таанышты.

Айжанат Рысбек кызы 2002-жылы 16-январда Нарын шаарында төрөлгөн. Учурда В.Чкалов атындагы мектебинин окуучусу. Ал орус, англис, немис тилдерин билет, кошумча кытай тилин үйрөнүүдө. Апасы мугалим. Чет тилдерин үйрөнүүгө апасы түрткү болгон.

Айжанат Германияда жүргөндө кезиккен кызыктуу окуяларды дагы айтып берүүгө жетишти.

«Мен мектепке киргенден баштап эле чет тилдерди үйрөнүүгө кызыктым. Биздин мектеп англис, немис тилдерин үйрөнүүгө жакшы шарт түзүп берип жатат. 4-класска чейин англис тилин окудук. 5-класстан баштап немис тили кошулду. Немис тилге басым жасайбыз. Себеби, жыл сайын бизге немистер келип, сынактарды уюштурушат. Ошол сынактардын бирин жеңип, Германияга барууга мүмкүнчүлүк алгам. 2018-жылы Германиянын Геттинген шаарына 12 күнгө барып келдим. Ал жак абдан жакшы жер экен. Чет жактан дос тапканга мүмкүнчүлүк алдык. Башка өлкөлөрдүн каада-салттарын билдик. Ар кайсы өлкөлөрдөн биздей окуучулар барды. Алар менен таанышып, азыр дагы сүйлөшүп турабыз. Ал жактан түшкө чейин немистер өздөрү бизге сабак өтүп турушту. Түштөн кийин атайын программа менен экскурсияга чыгарып, Германиянын көп шаарларын көрсөтүштү.

Германияда жүргөндө көп адаштым. Немистерден жол сурап, мейманканамды таап жаттым. Бир жолу чоң дүкөндөрдүн бирине капчыгымды калтырып кетип калыптырмын. Аялдамага жетейин деп калганда артымдан жумушчулары келип, капчыгымды колума карматышты. Ушундай окуя 2-3 жолу болду. Абдан таң калдым», - деди ал.

Айжанат кичинесинен түймө түйүп, «Жаш талант» сынактарында 1-2-орундарды алып келген. Ал 2 бир туугандын кичүүсү.

«Орус, немис, англис тилдерин билем. Азыр кытай тилин окуп жатам. Хоббим — китеп окуу. Бир күндө 1 китеп окуйм, көбүнчө классикага басым жасайм. Жаңы чыккан китептерди аңдып турам. Китептерди коллекциялайм. Бишкектен китеп алып келип, элдерге сатам. Келечекке койгон максатым — Кыргызстанды жакшы жакка өзгөртүү. Мектепти ийгиликтүү аяктоого бар күчүмдү жумшайм. Кичинекей кезимде журналист болууну самап жүрдүм. Кийин жактоочуларды көрүп, юрист болсомбу дегем. Бирок бул оюм да өзгөрүп, эми котормочу болоюн деп жатам.

Тил үйрөнүп жатканда аудио көп угам. Мисалы, тасмаларды башка тилде көрөм. Башка улуттагы адамдар менен көп сүйлөшөм. Ошондо практика болот. Сөздөрдү жаттап, грамматикага көп көңүл бурбоо керек. Эң башкысы сүйлөсөң эле болду», - деди ал.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Пикирлер
Для добавления комментария необходимо быть нашим подписчиком
×